الوقتي الكل بقي على القهاوي مترصص زي الفول في الورقه متقرطس ايدهم متبته في السجاره وهما في الحاره رايحين جايين بيدوروا على شغل لحد عارف يشتغل ولا حد عارف يتشل التفكير سيطر على العقول واتظبطت الافكار بالمساطر ولاحد فاكر انه كان شاطر لحكومة بتدي فلوس ولا بتدي فرص دي بتدي بالزخمه و الشلوط اسرائيل ندهت عليهم انتوا فين يا شباب دنا معايا المال بس شد الترحال تعال عندنا تكسب مننا و تبقى واحد زينا راح الولد شايل شنطته رامي همه تحت جزمته نسى بلادي بلادي و نسى الاغاني الوطنية نسى رافت الهجان و بقى نفسه يبقى زي جمال مروان وكله بقى في التوهان بدل ما يدولي خدوا مني فلوسي يا على تعليمي يا على على علاجي تقولي وطن وطن مين يا جعان دنتا مش لاقي حاجة تاكلها حتى في رمضان سبنا نقول الى جونا و ناخد فلوس تبقى في يوم مكفينا مش عيب تبقى بيعانا و تقولي ليه بعتوني بعنا ايه وكسبنا منك ايه دنتي طول عمرك سيبانا ودايما مضروبين وولادك الى ناهبيك ساكتين ليوم شفنا فيكي سعد ولا خدنا منك وعد دنتي عجزتينا و رمتينا راجعه تاني تدوري علينا.
عمرو وائل الشايب
20/12/2010
مجله هــرشــه دمــاااااغ
4 الكومنتات:
بلادي بلادي و نسى الاغاني الوطنية نسى رافت الهجان
********
ومين فاكرهم انا تقريبا لما بسلام السلام الوطني ولا اغنيه وطنيه كل ذكرياتي بيها طابور المدرسه زمان
عندك حق والله يا عمور الشباب ضايع ومش لاقى حاجه يعملها غير القعده على القهاوى بس انا معترضه على شىء معين ان احنا مش لازم ننظر لبلدنا النظرة دى اوى كده اى نعم فيها مساوىء كتير بس الشباب لازم يكون ليهم دور
الصراحه ربنا يكون فى عونكم
دمت بكل الخير
هااااااااى ازيك
يارب تكون بخير دايما
بجد الكلمات جميلة اوى ومعبرة ياريت الكل يقراها
وحقيقى سعيدة اوى انى دخلت المدونة من تانى
تحياتى سلام
صح..مش معنى انا حد يبيع بلد حاجة صح..لكن صعب كمان تفكر حد ببلد ووطنية و هوا مش لاقى ياكل و لا يشتغل..و هو مش قادر يحس بأقل قدر من الانسانية..حاجات كتير لازم تتغير..حلوة النغمة اللى فى الكلام..
إرسال تعليق